وَكَأَنِكْ حِلْم وَمَعَدِى * على عبد العليم طائر العنقاء

وَكَأَنِكْ حِلْم وَمَعَدِى
***************************
وَكَأَنِكْ حِلْم وَمَعَدِى
وأقول هدى
ما تسمعنى 
ولا حتى تودعنى
بكلمة حب مكتوبة
أو حتى لمسة
محسوبة

وكأنك
وردة مرسومة
وملموسة
ف كراسى وف كتابى
بلون يومى ..
على خدى
على هدومي

وانا العايش
كدا محروم
من حبك
ومن وجدك
وأقول يمكن ف يوم
ترضى

وأقول يمكن
ف يوم تهدي

وأقول يمكن
ف يوم تبقي
شراع ودِّي
أتاري الحلم
مش أدي
وانا معدي

بحور الحلم ... يطويها
فلاقي الصورة ترسمني
أمل بكره
وقلبي مركبة ... فيها
والاقي شوق بيتاخر
على الآخر
بيلقف ضحكة ناسيها

شراع قلبي
بتلعب بيه الريح
ولا بيحسب
ضرر ليها
ومجدافه أمل دايب
بموج حلمه
وأمانيها

فبشعر إن انا ملاح
وراكب مركبي وحدي
لا خايف موجة تحدفني
ولا خايف هبوب لرياح

وبعزف للأمل ألحان
وشوفك وردة
ف البستان
يرفرف قلبي
شوق وحنان

يا ساكنة جوا حشا
قلبى .. وف الننى
يا أجمل فرحة
تحضنى

ما أنا إبنك ومن حالك
وشايل هم ... أوحالك
ولو يوم العدو.. جالك
تلاقى عمرى .. أبقالك
ما انا إبنك ومن حالك

ما انا برده يا ست الحسن
أساس ضلك
وانا جيلك .. وقنديلك
وانا خلك

وانا الحارس ... وانا الفارس
وانا شعبك
واعيش من خيرك واتنعم
ثمار شعبك

وأضويلك
ف ليل الهجر
واغنيلك مواويلك
ف عز الفجر

ما انا برده يا ست الحسن
شموع فرحك
يمين حالف ما فيه مثلك
يا تبر بعشقه تراب أرضك
أنا الحالف أصون عرضك
وأكتبلك شهادة حب
فوق رملك.

وأغنيلك بكلمة شوء
بلادي الحلوة أنا حيلك
وقنديلك

وانا برده يا ست الحسن
أمل بكرة ف يوم
مرسوم بلون القهر
على جبينك

وامنى القلب ف وصالك
واغنيلك
على الضلة على القمرة
على حالك
ما انا حالك ..

قوليلي مين أوحالك
بفكرة إني أخون العهد
ولا أصونك ولا اوفييلك
ف يوم الود
ومين جالك بعنقودي
وطرح الورد
ومين شالك ف نن العين
ويغزلك حروف المد

مفيش غيرى
أنا ليكي
وأفديكي واكون ليكي
فدا للعهد
بقلك بكل ما أملك
بعمري حالف اجمعلك
سنيني وكل
قصايد ود
***************************
على عبد العليم

طائر العنقاء