أنا الشاعر اللي حير قلمه * ابراهيم بدر عبدالله

أنا الشاعر اللي حير قلمه
يفرح لفرحه ويموت لألمه
ببكي.......م الهوا
مش عارف وجوده من عدمه
ترقص حروف الغزل
والشر مني اتعزل
في ناس بتحلف بحرفي
وناس يقولوا دا هبل
وكل يوم اتشعبط ف التوتة
واكتب مية رواية
واحكي ألف حدوتة
والكلمة جوايا محبوسة
والضحكة عندي مكبوتة
برسم قصور من خيالي
لما بالي يبقى خالي
ألقى نجمي ف العلالي
ألف قافية مشتاقالي
لا بعرف اللوع ولا العوجان
ولا ليا ف اللف ولا الدوران
شاعر مسكون بمية عفريت
بغزل الأمل بفرحي
واكتب الهموم بجرحي
لا بعرف غفير من وزير
حرفي لابس توب حرير
انا...........أصلي
للحق ببقى أسير
انا القاضي للكلمات
بقوم ساعات وساعات اتكفى
واظبط كمان الدفة
وعيني فيها ألف مليون رفة
أنا الشعر ليا فن
والشعر عندي حرفة

ابراهيم بدر عبدالله