( واحد من العامه ) شعر \ احمد التبينى

( واحد من العامه )
شعر \ احمد التبينى
سألنى ايه ارسمك
انا قلت فوق ف السما
ارسمنى كام دايره
حوالين فراغها سواد
اما الفراغ
ف سماوى وللا فُسدقى
ينور الضلمه..
غير فراغها ف النهار
لجلٍ تبان الصوره..
وضحنى ف الصوره
عايزك تفوق..
عمك دافنشى
وف كل دايره من الدواير
اوعاك تحوشنى..
حُط الملامح كلها
وارسم بريشتى..
وللا اقول لك..بلاش
كل الدواير مش انا
واشمعنا دلوقتى
انا حد ح يشوفنى!
كل الدواير وهم
وانا اللى بحلم انا
محتاج تفوقنى
الطمنى ع الخدين
دى الشهره رزق انكتب
للموعدين م السما
والحسابين ينبرى
سن القلم ينقصف
يجى ستميت مره
اضرب كمان كفين
نسينى اكتب شعر
أو غير اللوحه
وارسمنى واد عادى
مايحبش اللمه
ماداقش طعم الفن
ولا يعشق الكلمه
ارسمنى وسط الجوع
واحد من العامه