ورقة توت* كلمات الشاعر : سليمان صالح احمد ( سليمان خطاب )

ورقة توت
============
انا موصوفلك
بين السطور تلاقينى
حروف تعشق
تراب سكتك
وف ضحكتك
بيطير حمامى
يجمع تقاوى النور
شبابيك
وديك يصحِى الفجر
من نومه
ونقش الندى
ف هدومه
يطرح للنهار يومه
تشقشق ف السما شمسك
ومن همسك
يحلا الغُنا لعنيك
أنا اللى موصوفلك
ومين غيرى ح يتحمل
من الاخر من الاول
انا من وحل ايامك
وانا اللى انكسر عودى
من لحن أوهامك
وابلع دموعى
واخبى الجرح جوايا
والحس صحون الصبر
ف عشايا
حتى الغطا موجوع
والحلم لقمة وستر
وحبة ضى فى السكة
نفسي انام مرتاح
وكفايه نوم ع الدكه
قالوا : بكره تتعدل
وعدا بكره واخواته
ولسه الدمعه
ف جفونى
ولسه الحلم
فى مماته
ما فضلشي منى يا وطن
غير حبة صلا وسكوت
وعمر شايل سكته
عارف طريق الموت
وحلمى اللى باقى ف دنيتى
تسيبلِى ورقة توت
======================================
كلمات الشاعر : سليمان صالح احمد ( سليمان خطاب )