انا المواطن أشعار محمود طنطاوى

انا اللى بلدى فى وقت الشده تلاقينى

فداها الروح ونور عينى

انا اللى صبرت ع الايام وكان همى اواسيها

واقول بكره حيجى نهار ويشرق فجر لياليها

بوصيها

بوصيها عشان لاحت بشاير خير

ونور الشمس بيغازل سواد الليل

بوصيها وايدى شابكه فى ايدها

وبتنيها وبفرشها

وبفردها واكرمشها

واحننها ووشوشها

عشان مليت خلاص عشها

يابلدى

يابلدى..انا مواطن ومعرفش وطن غيرك

ابوس راسك وابوس ايدك

واشد فى طرف جلابيتك

تضمينا وتحمينا

دنا منك وانا ليكى

بحبك حب مش عادى

واردد كل اغانيكى

بوصيكى

بوصيكى وانا واحد من الثوار

كشفنا الليل عشان يطلع عليكى نهار

ومجلس شعب وحكومه

وبقى لينا رئيس مختار

بوصيكى تخليهم مع الغلبان

وسيف العدل ع الظالم يكون بتار

عشان خيرك يكون ليكى

وانا المواطن الغلبان

يروق بالي ويبقالى

نصيب فيكى

بوصصييكى