سامع نــــــداك من بعيد * كلمات الشاعر / ناصر عبد المقصود

سامع نــــــداك من بعيد
يا مصر فين حق الشهيد
مرسومة ليه همً وأسى ؟
أمتى أشوفك من جـديد ؟
وألا خـلاص إحنا بقينا
شعب محكوم من حديد
ما تقومى يا أمًا ترحرحى
مش عارفه حتى تفرحى
فوقى يا مصر وصحصحى
قبل الأمل ما يروح بعيد
وألقاك يا أمًا مش هنا
ولا حتى كـــلمة حنينة
ونعيش نعــذب بعضنا
وأنسى إن كنت فى يوم سعيد
هاتى القلم نمحى الألم
ونشيل هموم اللى انظلم
ويقــــــوم حفيدى للعلم
يضحك فى وشك بالنشيد
يا مصر فين حق الشهيد ؟
طالع يقولك إنه لسه بيعشقك
فجأة رصاص الغدر طاله فى مركبك
والدم سايل على التراب وبيسألك
حقى اللى ضاع جواك بكره راح يزيد
همسة عتاب ساعة الضباب
قومى اسألى مين اللى غاب
كان اسمه لسه يا دوب مسجل فى الشباب
طالع يقولك بعشقك
مات الولد وفى ايده ماسك ضحكتك
كان نفسه ترجع فرحتك
ولا كنش يعرف إن يوم للغدر إيد
قوم يا بطل ماتخفش حقك عندنا
قوم يا بطل الهم ساكن قلبنا
والدمعة لسه فوق عيونا ملسنة
منعانا نضحك من جـــــديد
القلب لسه فيه شجـــــــــن
والدمع فى عيون الزمــن
ويا مصر فيك كام كفـــن ؟
علشان أعيشك يوم سعيد
قومى اضحكى لو تعرفى
أو حتى فيكى شئ وفى
كل اللى فيكى بيختفى
واللى فاضلى ما عاد يفيد
سامع نداك من بعيد
يا مصر فين حق الشهيد
كلمات الشاعر / ناصر عبد المقصود