قصيدة : { حرامي الفيس } للدكتور/خالدعبدالحميدخربوش

قصيدة : { حرامي الفيس }
للدكتور/خالدعبدالحميدخربوش
………………………………………………………

أعرف شكل حرامي الحَلَّه

(نَمْل)حقيقي ومش تأليس

مابيسرقش.....وإيه العِلَّه

إنُّه يوافق إسم خبيث؟!!

ح نتوه بيها فـ حاشا وكلَّا

إذ ربما...هل بَت...ّ وحيث

واللي يزوِّد طينها مَبَلَّه

ماطلبهوش ولا قسم بوليس

يبقى الظُلم دا بيِّن واللَّا

دي إختراعات تلاميذ إبليس

لكن فيه بقى شخص فـ ضِلَّه

م الحراميه بتوع الفيس

شكله غريب وعجيب إنْ حَلَّ

يقلب جوّ الفيس يامغيث

عامل عُصبَه وأحقر شِلَّه

منهم..فيهم..كُلُّه رخيص

فاهم إنّ كلامي لُه غَلَّه

يحصد فيها بدون تدريس

دي فــ دواويني بحالها ياقِلَّه

لك ولغيرك ده تايئيس

يعني فــ دار الكُتُب الفُلَّه

معروف دي لمين وبتأسيس

و فـ دفاترها تروح تتمَلَّى

فـ شهر عقاري لأنِّي حريص

يعني ياتافه مش بــ اتسَلَّى

مش ح ادِّيك الفُرصه تِهِيص

شحط أصيل وبصوره مُمِلَّه

فاكر نَشْرِي مالوهش ونيس

يشحت في الصداقات بِمَذَلَّه

بعد قبوله يبان عتريس

يمدح في مُشاركاتُه ماخَلَّا

علشان يسرق بالتدليس

مش محطوط للسرقه مَظَلَّه

يسرق مُجمَل وتقصقيص

خايب قوي ويبان مِن ذَلَّه

مهما اتذاكى بيفضل تيس

واضحه طريقته وباينه ودَالَّه

على وَطَيَانُه...دون..وخسيس

**********************************

الدكتور/

خالد عبدالحميد خربوش

من ديواني المعنون:

عهد جديد