المصرى بتاع زمان / بقلم د.علاء البسيونى/ مجلة ورد المنى
المصرى بتاع زمان....
بقلم د.علاء البسيونى
قعدت على شط ترعة بلدنا
افتكر ايام زمان
ايام ماكانت الدنيا بسيطة
والقلوب والمشاعر مليانة حنان
لقمة هنية تكفى ميه
تلقأها دايما على كل لسان
كانت اللمة حلوة
مافيهاش عداوة ولا مصلحة ده كان زمان
واحكى ياراوى واعزف على الربابة
اجمل الالحان
قول وأحكى الحكاوى
عن المصرى بتاع زمان
المصري بتاع بلدنا افتكروا كدة
المحبة والمعزة كنز كامن جواه
والأصالة والشهامة كانت علامة اتولدت وياه
كنت لما تمشى ساعة الغدا فى الغطان تلاقى اللمه
محمد ورمضان وحسن ومينا وحنا قاعدين معاه
سريس وجعضيض وحزمة فجل والكوز ميه نيلنا ملاياه
وحتة جبنه حدقه وحتة جبنه بيضاء وعسل اسمر يامحلاه
وعيش قمح بيتى معمول بايد امى ست الحبايب مقمراه
ولا الحلاوة وانت مارر عليهم والصوت فى نفس واحد
اقعد يافندى من غير سلام لقمة هنية تكفى ميه
والف ايد تمدلك إيدها بالله عليك تقعد يافندى
جابر اكلنا على ماقُسم دى الصحبة حلوة مع الخلان
وأروى ياراوى وقول كمان ساعة العصارى وسط النسمة الهنية ومشى الصبايا على القنايا وضحكتهم الحلوة ولا رقتهم
وتنهدتهم عبير ورود ياسمين وريحان
بس منظرهم وتنطتهم وبهجتهم وبصة منهم تشفى العليل العيان
ولا فى الأحزان تلقى ناس بلدنا فى المصايب أيد واحدة
وساعة الموت تلقى العيال قبل الرجال الكل همة وفلان
تعالى اجمع ياخال
والشيخ قبل الشباب الكل لمة فى الدفنه حاضر والصوان مليان لاخره فى الليل سابح فى النور
ولا الصوانى وكرم الضيافة للى جى يعزى من كل بيت فى بلدنا ديا تطلع صنية مساهمة منهم لأهل الميت
ماهو كان حتة منا
ياما قعدنا ياما لعبنا ياما سهرنا والقمراية سارحة على الغيطان.
دى كانت حياتنا ودى كانت عادتنا ايام زمان
شوفت ياصاحبى شوفت يا حبى هو ده المصرى اللى كان
هو دة الولد ابن البلد غرة وعلامة ابو الشهامة رمز الأصالة
والنخوة فيه عادة موروثة مغروسة فين ده الآن..
وجيت ابص دلوقتى
القى الخيانة والنتانة طبع سايد
وسط المصالح كيلها طافح
والناس معمية فى عيشة غبية
والنعمة نقمة مش لاقى اللقمة
ولا المحبة والمعزة والنخوة باتت موضة قديمة
وابن الأصول بات عملة نادرة وطلع علينا ابن اللئيمة
والصورة فى الزمن ده بقت خيال وخطوط عتيمة
وأروى يارواى على الربابة لحن حزين بصوت أنين
يملى المكان حسرة وشجن على زمن مافهوش أمان
على اللى حصل واللى كان
على الدمعة اللى ملت العيون
والحسرة إلى خلت القلوب بيها مدهون
ذكريات ذكريات وحسرة على زمن فات
ولقتنى وسط همومى انى لسه قاعد على شط ترعة بلدنا
اتمنيت ساعتها ان يتغير زماني والقانى عايش فى الزمن اللى كان..
زمن المحبة والمودة الأصالة والشهامة بتوع زمان
نفسى اقابل مرة تانية المصرى حبيبى بتاع زمان
نفسى اقابل مرة تانية المصرى حبيبى بتاع زمان
د.علاء البسيونى
تعليقات
إرسال تعليق