الحُب لو إحنا هنختاره -بقلمي الشاعرة زينب شبل
الحُب لو إحنا هنختاره
دا ميبقاش حُب
دي حاجات على اسمه
بتتسمى
من شرق وغرب كتير لمة
ويعلمها الرب
الحب بجد اللي حقيقي
ما بنختار هوش
دا قدر ف طريقك وطريقي ما بنعرفهوش
الحُب قدر و كبير همه
وبيمحي ذنوب
مسكين اللي بيجري ف دمه
و عليه مغصوب
ماهي أصل قلوبنا وبزيادة
غاوية قيادة
وإن إدت أمر
بندوق المُر وكالعادة
تتبدل قهوتنا ل ساده
ولآخر العمر
يعني من الآخر بصراحة
انسوا إن الحُب دا فيه راحة
أو فيه استقرار
أرواحنا بتفضل سواحة
وقلوبنا ف إنعاش يا جراحة
يا تبات على نار
و الفكرة تروح تبعت فكرة
وسنين بتفوت
وتعدي عليك وانت ف سكرة
مش عارف يومك من بكره ومنتش. مبسوط
وإن عدى الفرح عليك حبه
او تحلم بيه
تخطفو وبتجري وتتخبى
وبتحضن فيه
الحب دا سجن وسجاننا
هي قلوبنا
بننام فيه نحلم بالجنة
والصبر بيمحي لنا ذنوبنا
نتحمل ياما وفيه غيامة
دايما ع العين
ساكنين دوامة وناس ياما
بايتين صاحيين
الحب وجع
ودموع ع الخد
واجدعها جدع
راح له واتشد
بقلمي الشاعرة زينب شبل
٧/١/٢٠٢١
تعليقات
إرسال تعليق