كلاكيت / الشاعر محمد العليمي العليمي
كلاكيت
وتخلص القاعده فى مشهد
ولقطه واخده كادر متحور
ومتصور فيه جوع ع برد
كتر الامل فرد سيطرته على الحد
وانا حد بخلق ظروف بمزاج
وقلبى اللفاف فى المولد
متعلق بالمقامات والذكر والتسابيح
وكلام تانى خالى من التجريح
وبصب جاز على نار بمجاز
واوارى كلامى وحروفى
بالتشبيه
واغزل من الكلمه بيت بالجنه
وقلبى صريح وبيتمنى
انول نظره واكون من المجاذيب
حقيقه فى لحظه بتتحول
لحلم صريح وخيال
واضح وبشاره
وانا صغير كنت بعشق الحاره
ومداوم على تشجيع
عركة الديوك
وطالع بخربوش فى الوش
من كلام الغش والتدليس
وتلبيس الحق بالباطل
فى نقاش فقير ورغيف فاضى
معلش مش فاضى
ولا راضى عن المشهد
الكادر مزنوق فى ظلمة الحاره
وفتوه بنبوت بتحدد المطلوب
ويتوعد الخاطف لصور واضحه
أنه مش قابل والصور مش ها تمر
ويجى المر لابس شوال من خيش
بملامح حاده ووجه حر من شيب
واصل الشيب بالروح
ويطفو على الوش
ولما تغش تتقطع التقاسيم
وتخاصم التفاصيل
وتلاعب صاحبه قمار
على المشاريب
والغلبان المغلوب
هايشرب ايه غير زل
والصادق الكسبان ها يقش
ورقه كله بيطلع الواد والكومى
.وانا كومى فى الغالب
متقسم قبل ما بيجى
بين صاحب حق
وبين حقوق الغير
والباقى يدوب ورقة
توت تغطى العوره
والعوره صوره للحاجه
والدين بيكسر ظهر المحتاج
وانا محتاج أصحاب صالحه
والصلاح كله فى النيه والصحبه
تعليقات
إرسال تعليق