يا ناس ياعسل..الكذب وصل/بقلم/نصر بدر

يا ناس ياعسل..الكذب وصل

    مسرحيه من فصل واحد

المنظر حي شعبي..نهار داخلي..شقة شاب اعزب كل شيء فيها يدل علي الاهمال وانعدام النظافه..وعدم الترتيب..ملابس ملقاه بغير عنايه

جرائد في كل مكان..تراب يغطي معظم المكان..

هو _ جالسا في سريره حيث يعيش وحده ووالداه يقيمان في احدى 

       محافظات الدلتا ..يعرف احد الفتيات عن طريق معاكسه هاتفيه

       وهي ايضا تقيم في احد الاحياء الشعبيه الفقيره بينما تكذب عليه

        وتتظاهر بغير ذلك...        يطلبها في الهاتف   فترد  

هو _ انا اسف  الظاهر غلطت وطلبت رقم قفص عصافير  ايه الزقزقه

       الجميله دى  ..فينك مش باينه ليه..عشان كده الشمس ما طلعتش

        النهارده..

هى _ ابدا ياحبيبي ..تعبانه شويه..النهارده صحيت من النوم وزنت 

        نفسي لقيت نفسي زياده مايه وخمسين جرام  زعلت اوى اوى

       رحت النادى عشان الف التراك واجرى شويه عشان اخس وقعت

        علي رجلي..حتي تركت عرببتي في النادى ورجعت بتاكسي..

         بينما اساسا لا فيه نادى ولا عربيه والحقيقه انها طلعت سطوح

        منزلهم تلم الغسيل اتكعبلت في السلمه المكسوره.

هو _ لا يا حبيبتي الف سلامه عليك ..لا خللي بالك من رجليك اصل 

        دول غاليين عندى اوى وبعدين انت وصفتي رجليك انهم احلي

         حاجه فيك. ..

هي _ وانت ياحبيبي اتغديت ولا لسه ؟

هو _ الحمد لله اتغديت من شويه. ..عملت صبنيه مسقعه باللحمه 

        المفرومه وارز بسمتي وكان عندى فرخه في الثلاجه حشوتها

         وسويتها واتغديت الحمد لله ...والحقيقه انه لايعرف حتي يسلق

        بيض وكان بجواره علبة كشرى اشتراها من محل جوار منزلهم 

        وكان يأكل  منها اثناء حديثه معاها..

هي _  ايه ده ياحبيبي  انت بتعرف تطبخ ؟ كان نفسي اتجوز واحد

          بيعرف بطبخ  هايل..انا كل يوم احبك اكتر..

هو _ طبعا انا أستاذ في المطبخ ..لما نتجوز حا تكلي من ايدى احلي 

       اكل ..صواني علي طواجن علي حلويات علي حركات..وبعدين انا

       من انصار ان الزوج يساعد الزوجه في المنزل..حتي كمان يتوفر

       لنا وقت نقعد مع بعض ..نخرج مع بعض .  وحاجات كده مع بعض

هي _ بس عشان انا مكسوفه..وبعدين ياحبيبي الدايت اللي انا عاملاه

      حاسه معاه اني مرهقه ...ثم تمد يدها الي طبق كبير علي رجلها

      بها تشكيلة محشي ورق عنب علي بدنجان علي كرنب وتضع في

     فمها عدة صوابع مره واحده..وترفع الي فمها طبق به ملوخيه

      خضراء وتشرب منه مباشرة ثم تمسح فمها بملابسها .

هو _  فينك ياحبيبتي  ساكته ليه...وهي تمضغ الطعام  ترد عليه..

هي_ابدا ياحبيبي بحب اسمعك وانت بتتكلم  وانت بتتنفس حتي وانت

      ساكت بحب اسمعك..

ولأن  العروسه للعريس والجرى للمتاعيس ..وساعة القدر يعمي البصر..الاثنين اتدبسوا في بعض واتجوزوا فعلا...

                                المشهد الثاني

المنظر نهار داخلي..شقة الزوجيه..هو جالس علي كرسي انتريه يقرأ 

في الجريده امام التليفزيون والريموت بجواره ويشاهد بين الحين والاخر قناه تذيع اعادة لمباراة كرة قدم..

هو _ ياللا ياهانم حضري لنا حاجه نفطر انا جعان 

هى _ مش حاتقوم ياحبيبي تساعدني في المطبخ ؟؟

هو _ مطبخ ايه ياعسليه ..ايه السكر ده..انت كده حاتلمي النمل علينا.

      من اولها بقولك اسلكي واتحركي اوعي تسوقي العوج علي اللي

       طلع لك الرخصه..امشي حضري لنا حاجه نطفحها ..انت لسه 

         واقفه.. اتحركي اعملي لك همه..

هي _ مش انت قلت ياحبيبي حا تساعدني في المطبخ..

هو _ يحدثها بطريقة نانسي عجرم..مطبخ ايه ؟ قصدك انا ؟ ثم يضحك

      بسخريه ..انتي عارفه البيض المسلوق..انا مااعرفش بيحطوا له

      الميه قبل ما يسلقوه ولا بعد ما يتسلق ..انا مااعرفش اعمل اصلا

         كوباية شاي  ..خفي نفسك بدل مااقوم اخفك..وبعدين تعالي . 

             الاول خدي وشي اغسليه عشان كسلان اقوم اغسل وشي

             وبعدين خليك واقفه جنبي شويه عشان عاوز اتاوب..اتثاءب

                وبعد ما اتاوب ابقي اقفلي لي بقي ماهو مش معقول 

            اني انا اتاوب وانا اللي اقفل بقي برضه..هو انا حااعمل كل

           حاجه بنفسي ؟ امال انا متجوز ليه..باللا يابت.

ثم يسدل الستار علي مسرحية  ياناس ياعسل ..الكدب وصل .