نصيحة لولدى وتلميذى/بقلم: صبرى عبدالواحدالحساني

كلمات شاعر بنى هاشم

الشاعر صبرى عبد الواحد الحساني

       نصيحة لولدى وتلميذى

يا ولدى لو مش كده الكلمه ما تقولهاش

يا ولدى الناس الشينه ما تصاحبهاش

يا ولدى لو كبير قال كلمه ما تراجعهاش

يا ولدى نار الاخره صعبة ما هتستحملهاش

يا ولدى الكلمه لو طلعت تانى ما هترجعهاش

يا ولدى من بعدى خليك اب لإخوانك ماتنساش

يا ولدى أنا ربيتك بالحلال تربيتى ما تضيعهاش

يا ولدى الدنيا مهما طالت قصيرة ما تسواش

يا ولدى يمكن اكون غلطت غلطاتى ما تكررهاش

يا ولدى بكره هكون ماضى اذكرنى ما تنساش

يا ولدى اعمل لاخرتك ودنيتك ما تهملهاش

يا ولدى تعبت علشان اربيك والدنيا ما دايماش

يا ولدى الحرام ما تقربشى وغير الله ما تخشاش

يا ولدى  ام عيالك من فوق الراس ما تنزلهاش

يا ولدى ابوها ادهالك أمانة ما تخونهاش

يا ولدى كون ليها حضن دافي ما تهملهاش

يا ولدى ربى ولدك زى تربيتك الدنيا ما دايماش

يا ولدى لو مش كده الكلمه ما تقولهاش

يا ولدى حافظ على الصلاة فى وقتها ماتنساش

يا ولدى خليك للضعيف سند واوعى تكون واش

يا ولدى داين وما تداين حتى لو دينك ما جاش

يا ولدى اخواتك فى رقبتك امانه ما تفرطهاش

يا ولدى اذكرنى فى صلاتك بالدعاءما تنساش

يا ولدى خليك كد قولك وكلمتك ما تسحبهاش

والكلمه لو مش كدهاراجع نفسك وما تقولهاش