على استحياء_ الشاعرة فاطمة الصعيدي المركز الاول فى شعر العامية لشهر مايو 2025

 قصيدة باللهجة العامية المصرية

.على استحياء
على استحياء باقول آسف
واخبي كسوفي مش عارف
واغمض عيني واندهلِك
واقول لِك تصبحي بعافية
واعيش الفرح بالعافية
والاقي اللقمة مش كافية
وضمة كفي مُش دافية
باحبك يا اللي ملكاني
وحبي جاب لِك الكافيَة
باحبك يا اللي ملكاني
وحُبك جاب لنا الكافيَة
ومُش حاسباني من أهلِك
وقولتي إني ما استاهلِك
ولا اشبه لِك
ولا سُمرة تراب أرضِك شبه وشّي
وانا طول عمري باتعالى
وباتفاخر وانا بامشي
عشان لوني شبه قمحِك
وضيع عيوني من شمسِك
ده انا يومِك وانا امسِك
ودمعي ميه عطشانة
وجايه تروي أراضيكي
واراضيكي ومُش عاجب
وعين الظلم مدفوعة
ومرفوعة عن الحاجب
ف ليه بينِك وبين روحي
يا روحي بتعملي حاجب ؟
وجَب نسفُه بحزام ناسف
على استحياء باقول آسف
يا كرهاني وانا عاشقِك
وراضي أسِف في تْرابك
وناسياني وانا فاكرِك
وفاكر كل أحبابِك
باعيش العمر واحيا بِك
عروسة واقفة في الزفة
وكل الخلق خُطابك
وولدي لما عدّى الحُول
في أول خطوة خطّى بِك
وانا في حياتي باكتب ليكي
واتهجاكي واقرا بِك
وأتملّاني في سطورِك
واعيّن نفسي خطّابِك
واقضّي العُمر ع المِنبر
أسيب النوم وأصحى بِك
يجف الحبر من قلمي
ودمعي حرف في جوابِك
جوابِك لما عيشت اسأل
وأتوسّل في محرابِك
ونبراسِك وقداسِك
يا ست الكل ابوس راسِك
سيبيني أحرُس العتبة
واقضّي العمر على بابِك
كلمات/
الشاعرة فاطمة الصعيدي
فاطمة طه عبد الفتاح الصعيدى